حكايات ستات

الارض راحت فين كانت تحت رجلنا من شوية

2011-07-11T06:32:00.007+02:00

فيه حالات الواحد بيحس فيها ان رجليه مش على الارض لما بيحس انه طاير من الفرح مثلا زي ما حسينا يوم خلع الرئيس السابق لكن كمان

احنا دلوقت حاسة ان رجلنا مش على الارض وان الارض الثابتة بتبعد عن رجلينا كل يوم عن اللى قبله

احنا كنا ماشيين صح الثورة اسلوبها كان راقي جدا وكل العالم بيحكى بيها وبالرقي اللى في الثوار اللى خرجو سلميين وهما بيضربو بقنابل الغاز و الميه مفرقاهم في عز الشتا ومش بيرددو الا سلمية سلمية

ايه اللى حصل بقى؟ هل كل البلطجة دي سلطة ونفوذ اعضاء الحزب الوطنى واتباع الوزراء اللى مشرفين في طره لاند ؟ولا دول اتباع الهاربين في لندن وسويسرا واسبانيا اللى مازالو ايديهم طايلة لابعد مما نتخيل جوا بلدنا ؟ ولا فيه ايه غير كده؟

طيب لمصلحة مين ان الشرطة مترجعش للشارع بطاقتها الكاملة ؟ ولما ترجع يتسلط عليهم البلطجية يقتلو الظباط فتكبر مسافة البعد بين الشرطة والشعب والكره بينهم يزيد ويصبح متبادل

ولمصلحة مين الفتنه اللى بيحاولو يحطوها بين الجيش والشعب مع كل حب الشعب والناس البسطاء تحديدا للجيش واحساسهم ان الجيش اللى حاميهم ؟

ولمصلحة مين ان الحكومة اللى معظم اعضائها ناس محترمة يشهد لهم بنظافة الذمة واليد والوطنية مش بتاخد قرارات حاسمة لتحقيق مطالب الثوار الا بمليونية لكل طلب ؟

لمصلحة مين حالة الاحباط اللى وصل لها الناس دلوقت لدرجة انهم يفكرو في عصيان مدني ووقف الانتاج والخروج للشوارع بالاكفان لان بقدر الحماس والفرحة والفخر بعد الثورة اتحول كل ده لغصة واحباط ومرار في الحلق ؟

دى بلدنا اللى ثورنا علشان ننفض من عليها تراب 30 سنة من التخلف والقهر والقمع والظلم ؟ ولا دي حته تانية غريبة علينا ؟

معروف ان الفوضى شئ طبيعي بعد كل الثورات بس كان نفسي ثورتنا تختلف عن كل الثورات زى ماهى من ارقى الثورات باعتراف الدول المتقدمة

امتى هنقف على الارض الصلبة ونبص حوالينا نلاقي مصر الحلوة رجعت تانى ؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟

يارب يكون قريب ِ

يارب احنا حسينا بالحرية متكتبش علينا ابدا ان تتسرق منا حريتنا وثورتنا وكرامتنا يارب انصرنا على كل اللى طغو وبغو وافسدو ارضنا الحبيبة وكسرو قلوبنا الطيبة وجوعونا ومرضونا ونصبو انفسهم الهة تعبد في واللى يكفر بيهم يا ويله

مش هنهى البوست زي كل مرة بما علينا دع الخلق للخالق (( لانه علينا اننا نرجع بلدنا تاني ونحافظ على ثورتنا البنائة ))

الارض بتتكلم عربي وشبابنا بيتكلم لاوندي

2011-06-26T06:11:00.011+02:00

الكاتب الكبير عباس محمود العقاد ليه مقولة شهيرة بتقول ((لغة الشارع تعكس لغة الامة ))

بمعنى ان اللغة العامية مرتبطة بثقافة الامة كلها يعنى زمان كان فيه كلام محترم جدا صحيح بعض الكلمات كانت لابسة طربوش زى ممنون ونهارك سعيد واشكرك واتحشم واختشي

وبتغيير وقع الحياة تغيرت الالفاظ لكنها كانت تتسم بانها غير خادشة للحياء العام لكنها كانت نتاج مستوى تعليمي مختلف ودخول ثقافات اخرى لنا وكان الالفاظ الخادشة يسموها الناس لغة شوارع وفي الغالب كان يتداولها بيئات معينة

اما الان مفيش هوية الفاظ عجيبة غريبة دخلت في بيوتنا وشوارعنا وعلى التلفزيونات في الافلام والاغاني والشئ المفزع ان فيها كلمات كثيرة جدا تميل الى الاباحية والالفاظ النابية الهابطة فعندما نسمع شباب سواء بنات او شباب يتكلمونفي اى مكان في جامعة او نادي او شارع تشعر لاول وهلة انك في خناقة في حي شعبي او منطقة صنايعية مع احترامي الكامل لهذه المناطق

يعنى انا فاكرة ان كلمة

سيس دى مكناش بنسمعها الا على لسان حد بيمثل انه تركي يقول سيس خرسيس ادب يوك ايه اللى خلاها من اللغة العامية دلوقت

كلمات زي افنيخه واعمل دماغ واتشبح واحلق له ونفض له واهرش وانتخ واشتغله ومزة وسكامونس وخيش واقفش وبيض وقديم قدم التاريخ واخر حاجة وخليها تاكلك وانزل من على ودانى وكحرته ومش عارفة ايه السنيين وايه التنيين...........................................

وغيرها من الالفاظ الساقطة اللى تخليك تحس ان اولادك بيتكلمو لاوندي واللى بعضها خادش للحياء العام وبه تلميحات لا يجب ان تسمعها بناتنا ولا ان تتلوث مسامعهم بها ولا يصح ان يتداولها الاخ مع اخته او الاخت مع اخوها وفي اعتقادي الشخصي ان المفردات دي من الاسباب الا ساسية اللى رفعت الحرج وكشفت ماتبقى من الحياء فظهرت المشاكل مثل التحرش او حتى تطاول البنت على امها وابوها بالرد وكذلك الولد فاصبح الاولاد دلوقتى العادي انه يشوح لامه وابوه او يرد كلمة بكلمة باسلوب فيه ندية وتطاول وده مش غريب بعد ما انقرضت معظم الفاظ الاحترام لكن اللى بيخلينى استغرب جدا الابهات والامهات فيين من اللغة دي وهل فعلا هو ده مستوى ثقافتنا دلوقت لو طبقنا نظرية العقاد ان لغة الشارع هى لغة الامة احنا وصلنا لمرحلة من التردي اللغوى اعتادت ودانا على سماع الالفاظ الهابطة لكن ما يخوفنى ان يصل التردي للاخلاق فنعتاد على سؤ الاخلاق ايضا

عندي سؤال محيرنى الشباب دول هيكون مستوى اولادهم الاخلاقي ومفرداتهم وطريقة حوارهم مع اولادهم ازاى هل شباب باللغة دي هيكون قادر على انتاج جيل يحمل الحد الادنى من التهذيب واللياقة ؟ اشك

لازم نلحق نفسنا زى ما طلع الشباب وعملو ثورة على الفساد السياسي لازم ثورة علشان الاخلاق والالفاظ والاحترام يرجعو تاني والا مش هنعرف راحيين لفين

باي يا ريس

2011-01-31T05:49:00.009+02:00

حقيقي انا عمري ما كنت بكره مبارك كرئيس لمصر لكني كنت اتعاطف ويصعب عليا جدا الناس المطحونة والجعانة واللى تحت الفقر ب 100 سنة وكنت دايما بحس ان المشكلة دايما في الحاشية اللى بتعامل الناس بمنطق السخرة وهى سبب مشاكل الناس كلها

بالاضافة للكلام في الاعلام في كل مناسبة وطنية عن ان الرئيس مبارك صاحب اول طلعة جوية في حرب اكتوبر الكلام ده'طبعا حقيقي ومعلهوش خلاف وكان بيأكدلي وجهة نظري في ان المشكلة في المحيطين مش فيه لان الراجل الفارس المحارب اللى عدى بالبلد مع كل الفرسان من النكسة للنصرلازم تكون اخلاقه اخلاق فارس يعامل الناس بآدمية ويحس بمعاناتهم

وجاءت الاحداث الاخيرة في مصر وطلعت الناس اللى عطلانة ومش لاقيه شغل والشباب اللى شاخ قبل ما يتجوز من قلة الفلوس وقصر ذات اليد والرجالة اللى ولادهم جاعو من الاسعار اللى ولعت نار وفاض بيهم من ربط الحزام 30 سنة لحد الحزام ما اتهرى واتقطع ومبقاش ينفع يتربط تاني خلالالالالالالالالالالالالالاص كله طلع يصرخ من وجيعته وطبيعي ان اللى متألم يشيل سبب الالم طالبو بتنحي الريس عن السلطة علشان نجرب حد تاني يمكن الحال يتغيربعد الناس ماجربت كل حاجة اعتصمو ومفيش فايدة انتحرو وقتلو نفسهم واولادهم مفيش فايدة ولعو في نفسهم برضه مفيش فايدة

ولان فكرتي عن الريس زي ما قلت لكم انه فارس من حرب اكتوبر ومتربي على ايد الظباط الاحرار وكمان هو محارب قديم واخلاقه عالية توقعت انه هيطلع علينا بخطاب تنحي زى بتاع عبد الناصر اللى بكى الشارع كله في يوم من الايام وحبب فيه الناس اللى كانو بيكرهوه

لكن للاسف كل ده محصلش واللى حصل ان الشعب المصري بدأ يضرب في يعضه الشرطة بتضرب في الشعب كانه اسرائيلي مش مصري وكان الشرطة بتطلع في الشعب غل شيلاه من سنين ليهم في قلبها ولا كأنهم ولاد بلد واحدة واللى بيتضربو دول اولادهم واخواتهم وبناتهم

وبعد الشرطة ما طحنت الناس وعملت اللى عليها وكفت ووفت وزادت وفاضت وكل ما تتخيلوه واتسحلت الناس في الشوارع وسابتهم بعد كده يخبطو راسهم في كل الحيطان وروحو بيوتهم طلع الرئيس قلت كويس خلاص كده الموضوع هينتهى وهيقول انه مش عايز السلطة ما دام الشعب مش عاوز هو هيحكم حد بالعافية شعب مش عايز يتحكم هو حر يروح يدور على حد تاني يحكمه ويجرب علشان يحكم بنفسه على الفرق لكن برضه حصل عكس المتوقع طلع وقال لا انا مش همشي انا هغير لكم الحكومة اللى اتفقست دي وريحتها طلعت لكن انا لا

ساعتها فعلا كنت مصدومة وقلت لو كان اتنحى في الخطاب ده كان هيكبر في نظري واكيد في نظر ناس كتير زيي و هيفضل صورته في عيون الناس الفارس الشهم اللى ميقبلش على نفسه ان دم الناس دي تكون بسببه لانه هيسأل عنهم يوم القيامة لانهم من رعيته واولاده ومحدش ابدا يقتل ولاده مهما كان الثمن حتى لو كان الثمن نفوذ وسلطة وكرسي معاه بقاله 30 سنة حتى لو فيه ايد خفية بتحاول تلعب باخواتنا وولادنا المفروض تمد ايدك ليهم مش تضربهم بالشرطة والذخيرة الحية لكن للاسف احتقن الموقف زيادة وزيادة واتسرقت البلد واتنهبت واتحرقت مش دي البلد اللى ربطنا على نفسنا الحزام علشان تتبنى بعد الحروب وانت تعبت فيها وانت بتاخد ديون من كل الدنيا علشان نبنيها ياريس ولا دي بلد غير بلدنا بجد الواحد مش عارف متهيألى انه كابوس اللى بيحصل ده اكيد مش في مصر الشباب اللى اتقتل واتصاب دول كانو بحاربو مين مصر بتحارب مصر ده شئ مستحيل اى حد يصدقه وليه الناس مكفرتش الناس عايزة تعيش تاكل وتشرب وتسكن وتتعلم وتشتغل زي كل بلاد الدنيا مش طالبين شئ خطير ولا كبير انسان عايز يبقى انسان فيها ايه دي ايه العيب اللى فيهاايه العيب في ان الشعب عايز يعلم ولاده كويس ويعيشو بنى ادمين بجد انا حزينة انك توصل الحال ان ولادك يهتفو بسقوطك انت ونظامك كان ممكن يعتبروك بطل زى ماكنت لو قلت لا مصر متستاهلش كده مصروتخرج عليهم بانفتك المعهودة وشموخك مرفوع الراس وكان التاريخ هيتوجك ومش هينسالك ابدا انك حافظت على بلدك وعلى ولادك

بجد ياريس انت غيرت مفاهيمي كلها وياريت الشارع يقدر يغير مفاهيمك وتلحق بقيت الشعب اللى انت مفروض واحد منه مصر تستاهل مننا احسن حاجة وافضل اداء علشان نرجع نبنيها تاني مستشفى سرطان الاطفال احنا اللى بنينيها بتبرعتنا ومجهودنا يرضيك تتنهب وتدمر وهى كانت بتعالج الاطفال اللى جالهم سرطان من اكلهم المسرطنات اللى دخلها لهم وزراء الحكومة اللى انت عارفها وعارفهم يا ريس دي بقى اللى خلتني اقول زى الناس لا كفاية بجد باي باي ياريس خلينا نلملم نفسنا ونحض بعضنا ونعالج اوجاعنا بعد ما اتصدمنا صدمة عمرنا

مش هقول زى المعتاد ماعلينا ودع الخلق للخالق لا علينا علينا كتير كمان علينا اننا نفضل ايدنا في ايد بعض زى الناس دلوقت ما اتحدت مع بعض وساعدت بعض شعب مصر بخير وطيبة وعمره ما هيتغير الا للاحسن ان شاء الله

مبروك للقطط وعقبال البشر

2010-08-07T04:32:00.031+03:00

فيه الناس مش لاقيين لقمة عيش او بيت لا ولا حتى اربع حيطان يأويهم وعلى النقيض تماما هناك قطط تعيش مرفههة مدللة متبغددة تنعم بالاكل والشرب والسكن وكل ما يمثل العيشة الكريمة طبعا مش بقلب عليكم المواجع ولا حاجة بس حبيت اعرفكم الدنيا فيها ايه زى ما شفتها في الصور بس طبعا فهناك مدينة تسمى بونتى فيدرا بيتش بولاية فلوريدا بامريكا اصبحت مدينة للقطط فقط ومدينة القطط دي تعتمد على التبرعات من الجمعيات الحقوقية او من محبيالحيوانات علشان تفضل على نفس مستواها وتقدم بها اجود الخدمات للقطط المسكينة بدل ما تبقى من قطط الشوارع وتسبب كارثة هسيبكم مع الصور وارجع اكلمكم شوفو دي حفلة غدا جماعى علشان يبقى فيه بينهم عيش وملح قصدي عيش ولبن ولا يمكن كورن فليكس ماهم ما يبعدش عليهم حاجة العالم دي عيب يا ست قطة بلاش وقفة البلكونات دي القطط الشبان متلطعين على النواصي وكده هتجيبى مشاكل وتعملى فتن ودى قطقوطة مع ابن الجيران فوق سطح البيت وفاكرين ان محدش شايفهم بس على مين كل شيجن انكشفن وبان يا سلام على الاستقرار والجو الاسري اللى عايشين فيه شوفو الرومانسية وهي بتوشوش الاستاذ لا استاذ ايه دا سعادة البيه هنا شوفو الطبيعية والرعاية اللى بتتعامل بيها القطط هنا بقى شكل البيوت بتاع القطط عقبال الشايفين والحاضرين والسامعين والشامين وكل البنى ادمين هنا الشوارع في وقت الذروة مش عارفة بصراحة ازاى عارفين يعيشو في الزحمة والخنقة دي الله يكون في عونهم لازم يعملو لهم مدن جديدة شوفو الروعة والجمال في العمارة

دا حي كامل من بعيد شوفو الروعة واتحسرو على نفسكم يا بشر دا بيت سياحي لطيف شوفو الورود والزرع والجمال حاجة تفرس البنى ادمين وتريح اعصاب القطط ولااااااد ال............ القطط طبعا متوقعنويش في الغلط دي فيلا في حي الفلل لان المدينة دي لازم تبقى طبقات مش كل يعيش مع كله كده برضه القطط مقامات

دا قط في اى بي شوفو جمال البيت وهو جواه برنس زمانه

شوفو تخطيط الحى عامل ازاى والبيوت متناسقة جاتنا نيلة ف حظنا الهباب

هنا باصص او باصة من الشباك يشوف الجو برة عامل ايه ده الامن بتاع المدينة علشان متفتكروش ان الدنيا سايبة وملهاش ظابط ولا رابط لا طبعا كل شيء بنظام ومدروس ومعمول حسابه دول القطط في تجمعات في الهواء الطلق اهو برده يغيرو جو ويكونو صداقات جديدة طبعا دى الشوارع وشوفة عينكم الخضرة والمنظر البديع وبلاش حقد انتو عايزين القطط يجيلها اكتئاب ولا ايه

طبعا ده من غير ار ولا حسد ولا نق ومع كل المواساة والتعازي لكل الناس اللى عايشين في عشش او في الشارع في الطل وكل العاطلين في كل مكان واللى انا متأكده انهم لو شافو الصور دي هيدعو ربنا انه يقلبهم قطط في امريكا اكرم ليهم من العيشة اللى هم عايشينها وكفاية بقى نق احسن دي قطط امريكاو متستحملش في ايدنا غلوة والعين تبين فيهم على طول

بس انا عندي اقتراح لو كبرو البيت ده متر ارتفاع ومتر عرض مش يكفي بنى ادم برضه عقبال الجمعيات الحقوقية ومحبي الانسان ما يعملو مدينة للبشر بس احنا مش هنقبل مستوى اقل من اللى عايشة فيه القطط دى علشان تبقو فاهمين وعاملين حسابكم من اولها وزي العادة احنا مالنا ما علينا (( دع الخلق للخالق ))

وحشتونى

2009-12-21T13:23:00.006+02:00

السلام عليكم ورحمة الله وبركاته

وحشتونى جدا واسفة اني اتأخرت عليكم الوقت ده كله لكن ان شاء الله سنعود للتواصل من جديد وكل سنة وانتو كلكم طيبين بمناسبة بداية

السنة الهجرية واهديكم الصور الجميلة دى اصالحكم بيها واعتذر بيها عن تاخيري عليكم

قال ايه عاملين مدينة برتقال ناس فايقة ورايقة جاتنا نيلة في حظنا الهباب اللى مش عارفين نرفع دماغنا من الغلا وانفلونزا الخنازير

وانفلونزا المعيز اللى طلعتلنا في المقدر جديد وهم بيفننو بالبرتقال اسيبكم مع الصور

يارب تكون عجبتكم وزي عادتي احنا مالنا (( دع الخلق للخالق))

رثاء ووفاء ودعاء

2009-03-30T01:10:00.005+02:00

انا لله وانا اليه راجعون

قال الله في كتابه العزيز((الذين اذا اصابتهم مصيبة قالو انا لله وانا اليه راجعون & اولائك عليهم صلوات من ربهم ورحمة واولائك هم المهتدون))البقرة 156&157

بعد ماكتبت الموضوع بتاع عيد الام (( قبلة على خد امي)) وقبل حتى ما ادخل مدوناتكم عشان تعرفو انى نزلت موضوع جديد حصل زلزال كبير هز بيتنا بعنف وهو وفاة زوج اختى اللى كنت كتبت عنه انه مريض اللى زلزنا انه مكنش مجرد زوج اخت دا كان الاخ الكبير بكل ما تحمله الكلمة من معنى لكن عزائنا الوحيد فيه انه توفي بداء الكبد يعنى مبطون ونسأل الله ان يتقبله من الشهداء كما بلغنا

رسول الله صلى عليه وسلم عن انواع الشهداء في حديث ( ما تعدون الشهادة ؟ قالوا: القتل في سبيل الله تعالى. قال رسول الله صلى الله عليه وسلم: الشهادة سبع سوى القتل في سبيل الله: المطعون شهيد، والغرق شهيد ، وصاحب ذات الجنب شهيد، والمبطون شهيد ، وصاحب الحريق شهيد، والذي يموت تحت الهدم شهيد، والمرأة تموت بجُمْع شهيدة) والحديث صححه الألباني في صحيح أبي داود. واجمع العلماء ان المبطون هو كل من مات بداء في بطنه

وهذا عزاؤنا الوحيد فيه ان يتقبله من الشهداء وينزله منازل الصديقين والشهداء والصالحين وحسن اولائك رفيقا

ولا نملك الا الدعاء له ولموتى المسلمين اجمعين

اللهم اغفر له وتجاوز عن سيئاته واغسله من الذنوب والخطايا بالماء والثلج والبرد ونقه من ذنوبه وخطاياه كما ينقى الثوب الابيض من الدنس اللهم ابدله دار خيرا من داره واهلا خير من اهله وجسدا خيرا من جسده الذى اهلكه المرض واجعل الام مرضه مكفرات لجميع الذنوب والخطايا اللهم افسح له في قبره مد البصر اللهم جافي الارض عن جوانبه اللهم وسع مدخله واجعل قبره روضة من رياض الجنة وانسه في وحشة القبر وانر له بالصالحات من عمله ظلمة القبر اللهم واجبر كسر اولاده على يتمهم يا جابر المنكسرين وكفف دمعهم واجبر كسر زوجته على فراق الحبيب والرفيق واجبر كسرنا واخوته على فقد الاخ والصديق اللهم ارزق اولاده الرزق الحلال الواسع الذى يكفيهم عن سائر خلقك وبارك لهم فيه اللهم اكفهم بحلالك عن حرامك واغنهم بفضلك عمن سواك وحنن عليهم قلب القريب والصديق اللهم واحسن مستقبلهم وحالهم وافرحه بهم واجعلهم الولد الصالح الذى يدعو له حتى لاينقطع عمله من الدنيا واسعد روحه بصلاحهم في دينهم ودنياهم

اللهم انا نشهدك انه كان نعم الزوج ونعم الاب ونعم الاخ ونعم الصديق اللهم اجعل هذا ثقلا في ميزان حسناته ورفعا لدرجاته وبياضا لوجه يوم تبيض وجوه وتسود وجوه واجمعنا به في اعلى عليين في جنات النعيم واكتب لنا حسن الخاتمة وشهادة في سبيلك يا ارحم الراحمين اللهم واجعلنا عند النعماء من الشاكرين وعند البلاء من الصابرين وعند الجزاء من الفائزين اللهم انقلنا بالقرآن من الشقاء للسعادة ومن الحزن الى الفرح ومن النار الى الجنة واجعله لنا في القبر مؤنسا وعلى الصراط مخلصا ويوم القيامة شفيعا والى الجنة قائدا يارب هذا لسان حالنا عليه وهو الدعاء له وكلنا نقول له لاشك ان سيرتك الطيبة ستظل بين كل من عرفتهم وتعاملت معهم اطول من عمرك الذى عشته بيننا فأنت الغائب الحاضر

فيا عالم من في القبور هل لسان حاله يقول لنا يامارا على قبري لا يحزنك امري اليوم كنت معك وانت غدا معي اللهم تقبل دعائنا له ولموتى المسلمين اجمعين وارجو منكم الدعاء له بالرحمة والمغفرة ولنا بالصبر فالدعاء بظاهر الغيب مجاب بأمر الله

اعتذر عن هذا البوست الحزين لكن هذا حال الدنيا معنا يوم بسمة ويوم دمعة

قبلة على خد امي

2009-03-21T23:32:00.007+02:00

انحنى حبا وامتنانا لامي الحبيبة واقبل خدها وايديها ورجليها واقول لها كل سنة وانت طيبة الف مرة كل سنة وانت تاج على رؤسنا دايما يا حبيبتى ويخليكى ليا ولاخواتى ولاولادنا يا ست الحبايب

ربنا يجازيكى مليون خير يامى عنا وعن تربيتنا قد ايه تعبتى لوحدك وقاسيتى لوحدك لحد ما طلعتينا بنات كل الناس بتشهد بدينا واخلاقنا و الحمد لله وربنا كافئك على صبرك على فقد الابن الاكبر والولد الوحيد اللى جرحك في قلبك وبعده فقد الزوج اللى سابك لوحدك وفي رقبتك تلات بنات اكبرهم مخدتش الثانوية لكن بالايمان ربنا هداكى للطريق السليم في توجيهنا وتربيتنا تربية تلات بنات مش سهلة وكفاية ان الرسول صلى الله عليه وسلم بشر اللى بيربى تلات بنات ويحسن تربيتهموتأديبهم زيك كده ان شاء الله يدخل الجنة ووفقك في جوازتنا وعوضك بصبرك على فقد الابن بتلات مهندسين زى الفل كلهم بيحبوكى وبيعاملوكى امهم مش حماتهم ويتمنو رضاكى وببركة صبرك ودعواتك لينا توج حياتك ب 7 أحفاد زي القمر أسد و6 قطط او بالاصح 6 بنات وظابط صالحين انشاء الله ربنا يجعلهم ليكى ولينا سند وعزوة وينبتهم نباتا حسنا بأمر الله وبدأنا نحس ان الدنيا ليها وش حلو وسعيد كنا بنشوفه في كل مرة بنتجمع فيها حواليكى نسهر ونضحك ونلعب لدرجة ان فيه ناس سألتنا هو انتو على طول بتضحكو كده ميعرفوش ان احنا في كل حياتنا كنا بنسرق الفرحة من الدنيا اللى كانت قاسية علينا طول العمر كنا بننتهز فرصة جوازة ولا ولاده ولا نجاح ونفرح بانتقام عشان مش عارفين بكرة مخبي لنا ايه لكن لان الناس ملهاش غير الظاهر بس كانت شيفانا بنبالغ في الفرح بالحاجات دى ميعرفوش ان اللى اتربى يتيم دايما نفسه مكسورة وعشان كده لما تيجيله حاجة تفرح بيفرح قوى على قد ما حزن قوى

لكن ربنا حب يختبرك ويختبرنا ولأن الدنيا دار ابتلاء مرض زوج اختى الوسطى مرض شديد وهو دلوقت بيمر بمحنة قوية لكن ان شاء الله هتعدى بخير ويرجع لولاده ولينا بالف سلامة وترجع لمتنا الحلوة تانى واحنا زايديين مش ناقصين وكلنا بصحة وعافية وهو ده شغلنا الشاغل دلوقت اننا نخلي اكبر عدد من الناس اللى قلبهم طيب يدعوله ربنا يعفي عنه ويشفيه ويشفي كل مريض يارب ماهو ربنا اللى قدر ابتلاؤه قادر على رفع بلاؤه والامر بشفاؤه (( اسأل الله العظيم رب العرش العظيم ان يشفيه شفاء لايغادر سقما))

اسفة على الاطالة وعلى ان تهنئة عيد الام عندي اخذت شكل درامي

لكن من قلبى بقول لكل ام كل سنة وانت طيبة وربنا يخليكى لاولادك

وكل اللى نفسها تبقى ام كل سنة وانت طيبة وكل سنة وانت ام لكل اولاد اخواتك واصحابك والسنة الجاية اولادك يزيدو واحد بابنك او بنتك ان شاء الله

ومش هقول ماعلينا دع الخلق للخالق لكن المرة دي هقول ((ادعو الخالق ان يشفيك يا اخي وزوج اختى الغالى)) يارب تقبل دعائنا له بظاهر الغيب

للاسف هو ده الواقع

2009-01-26T04:38:00.004+02:00

معجزة – عودة صلاح الدين

مصطفى الجزار ملتقى رابطة الواحة الثقافية

في القرآن ربّك قال للناس: "ادعوني"علشان هو كريم وبيِدّي وف رمضان الناس بتصلّي تملا الجامع في التراويح وإْمامهم يدعي ويعيّط واللي وراه بيقولوا: "آمين"عارفين كانوا بيدعوا بإيه؟ كانوا كل صلاه بيقولوا:يا الله رجّع لينا صلاح الدين...يا الله دا احنا بشوق مستنيّين يا الله لو جالنا هنقوم واقفين يا الله نمشى وراه ونكون طايعين يا الله و نحرّر أرض فلسطين يا الله بس ييجيلْنا صلاح الدين يا الله...*******

ربك دايماً..ربّ قلوب بيحبّ العبد اللي بيطلب وامّا لقى الملايين بيقولوا رجّع لينا صلاح الدين سبحانُه.. حقّق رغبتهم ولقينا الأرض بتنشقّ...!!! قُدرة ربّك مين هيكدّب ويقول: "لأ"؟! ولقينا فارس من نوروحصانه بيجري ويْدُوروف إيده السيف المتعافي استعجِبنا...!!!وسألناه: "انت اسمك إيه؟!" قال بالفُصحى:أنا يا قومِ صلاحُ الدين ْقد أحياني اللهُ القادرُحين دعوتم أنْ يبعثَني اللهُ إليكم ها أنا ذا قد جئتُ إليكم لكنْ نُبّئتُ بأخبارٍ عنكم سيّئةٍ للغاية كيف رضيتم أن يُنتهَك الأقصى فيكم؟! كيف سمحتم للأعداءِ بهذا الأمر؟! كيف تركتم بيتَ المقدس؟! كيف قَبِلْتُم عَيْشَ الذلّةِ بينَ الناسْ؟! إنى مِتُّ وأرضُ القدسِ مُطهّرةٌ من كل خبيث وتركتُ الأقصى من زمنٍ.. منصوراً.. مرفوعَ الراسْ فتنازلتم أنتم عنه... للأنجاسْ!!

لكن... لا بأسَ... فقد عُدْت ُوسنُرجِعُ جيشَ الإسلام جيشٌ سوف يقودُ العالَم أنتم.. جُنده..هيا قوموا...سوف نحاربُ.. حتى الموتْ هل مِن أحدٍ يُبدي رأياً فيما قُلت؟"*******

كل الناس كانت ف ذهول م اللي بيحصلواحد فيهم اتقدّم لصلاح الدين قال: "اسمحلي إنت صلاح الدين وانا عارف لكن آسف...ما اقدرش أحارب ويّاك أحسن أنا على وِشّ جوازعايز اشوفلي يومين ف الدنياأبقى عريس..أفرح واتمتّع و أهِيص لكن حرب؟!!!سلامُو عليكم... أنا مش فاضي"*******

واحد تاني قال: "اسمحلي يا عَمّ صلاح إني ما اروحش الحرب معاك عندي عيال عايز اربّيهُم وانا غلبان باقْطَع من جسمي وبادّيهُم لو رُحت معاك -افرض يعنى-مين هيأكّلهم مِن بَعدي؟ مين -لو رُحت معاك- يراعيهُم؟ أنا عارف.. ربنا موجود هو اللي بيرزُق... مش إحنابس انا خايف والبَرَكه ف باقي الرجاله هُمّا يسدّوا بدالي هناك وانا هادعيلكُم كل صلاه"*******

واحد تالت قال: "انا تاجِرعندي المصنع والدكّان ومشاغِل أشكال والوان أبقى عبيط لو سِبت مصالحي وْجيت ويّاك لكن هابقى معاكو بقلبي*******

واحد رابع...واحد خامس...سادس...سابع...عاشر...ألف...

كل الناس قالوا: "آسْفين رُوح وحدك يا صلاح الدين أحسن إحنا مش فاضيين لا لجيشك ولا لفلسطين إيه يعنى أقصانا سجين؟ ما هو في السجن بَقَالُه سْنين لو بالحرب هنُنصُر دِين...يِبقى خلاص ما احناش عايزين إحنا هنقعد منتظرين وهندعيلَك بالملايين:يا الله إِبْعِد عنا صلاح الدين يا الله إحنا بحالنا كده راضيين.. يا الله...*******

بعد ما قالوا كل كلامهم بَصّ صلاح الدين بعينيه مالقاش ولا واحد حواليه يعمل إيه؟ الأرض انشقّت من تاني علشان تاخدُه مارضيش ينزل تحت الأرض عايز يعمل حاجه ف بالُه فوق "الأرض"غَيَّر لِبْسُه ولِبِس زيّ شباب القُدس نفْس الشكل ونفْس اللون كان متغاظ من كل الناس اللي سابوه جَمّع غِيظُه.. تحت هْدُومُه ودخل وسط كلاب الأرض.. وفجَّر نفْسُه...علشان يفضل زي ما هوا... صلاح الدين لكن ساب في القدس رساله بيقول فيها إنه حزين علشان جيشُه ما كانش معاه"جيش حِطّين"و بيطلُب من كل الناس اللي بيدْعُوا كل صلاه لو طلبوه تاني ينصرهُم لما يقولوا: "يا الله..رجَّع لينا صلاح الدين"لازم يدعوا كمان و يقولوا:يا الله عايزين جيشُه يكون ويّاه علشان إحنا مش فاضيين مش هَنْسِيب المال والجاه مش هنسيب الدنيا الحلوه وْنِمشي وراه يا الله...مش عايزينُه ييجي لوحْدُه لازم جِيشُه يكون ويّاه لازم جِيشُه...يكون...ويّاه...

منقول لكن الصور مضافة منى لانه اعجبنى جدا وحسيت انه بيوصف لسان حال كل الواقع

وفى النهاية احنا مالنا ((دع الخلق للخالق))

يا غزة علمتينا العزة

2009-01-05T03:45:00.016+02:00

ملقتش موضوع ارجع لكم بيه بعد الغيبة افضل من موضوع غزة وما يجرى لاخواننا فيها من بداية حرب الرصاص المتدفق الاخيرة

انا واعوذ بالله من قولة انا شايفة الموضوع من زاوية تانية خالص شايفة اننا مزوديين الموضوع حبتين لاننا مش فاهمين الموضوع صح !!!!!!!!!!!!!!!!

متستغربوش قوى كده الحكاية كلها ان اسرائيل فكرت ازاي تكسب ود السلطة الفلسطنية وتتقرب للحكومات العربية ملقتش شماعة قصدى حل قدامها الا انها تخلص الناس من حماس اللى عملة مشاكل كتير مع السلطة من ناحية ومع الشعب من ناحية تانية وآخرهم مشكلة تأشيرات الحجاج الفلسطنيين وطبعا اسرائيل خافت انها تحمل ذنب الحجاج دول راحت داخلة بتقلها وخاطرت بنفسها وقررت انها تساعد الفلسطنيين حكومة وشعبا وتخلصهم من حماس وطبعا لما بدا حسن نية اسرائيل الحكومات العربة مكدبتش خبر وساعدت اسرائيل وشالتها على كفوف الراحة بالسكوت والطناش لحد ما تخلص مهمتها السامية في المنطقة

بس قلبهم مش جايبهم ومش هاين عليهم ماهم اللى بيتقتلو برضو مسلمين وعرب والدم يحن وعلى رأي المثل انا واخويا على ابن عمى وانا وابن عمي على اسرائيل فقالو يرضو ضميرهم العربي بشوية مفاوضات كده يمكن تهدي الجو ووالله ما قصرو

وطبعا كالمعتاد كل ما يجتمعو نفرح ونقول هنتوحد اهو وهنطلع من الاجتماعات والمفاوضات بحاجة مفيدة بس الفرحة مش بتطول ونفوق على الحقيقة المرة ونقول يا فرحة ما تمت خدها الغراب وطار

اما بقى الشهداء دول عمرهم انتهى لحد كده وزى ما كلنا عارفين محدش بيعيش ثانية زيادة عن اجله وزي ما هو معروف تعددت الاسباب والموت واحد وكمان في دي اسرائيل كان ليها غرض سامي جدااااااااااااا

اسألونى ايه هو ؟؟؟

هعتبركم سألتونى وهجاوب

اولا عشان تعلى منزلتهم وتكون سبب في شهادتهم ودخولهم الجنة انشاء الله

ثانيا انتو عارفين طبعا اننا بدأنا سنة جديدة وهى 2009 كل سنة وانتو طيبين وعزرائيل كان عنده شغل كتير تقفيل السنة بقى عشان نبدأ سنة جديدة على نظيف فحبت اسرائيل تساعده وتموتله شوية كده بالجملة يعنى ومش خافي عليكم الشبه الكبير بين كلمة(عزرائيل واسرائيل) شفتو بقى انكم دايما ظالمينها يا شررين

نيجي بقى لاهم جزء في الموضوع اطفال غزة دول بقى لوحدهم حكاية فيهم جزء مش اطفال ولا حاجة دول كانو من قادة حماس بس اتسخطو كده من الخوف بعد اسرائيل ما بدأت القصف

وجزء تانى كان بيفكرو لما يكبرو يحابو اسرائيل طيب خليكو مكانها هتسيبهم لما يكبرو طبعا لا من حقها تكسر دماغهم متدافعش عن نفسها يعنى

وفيه كمان جزء من الاطفال غبي شويتين اطفال اسرائيل الطيبيين وقعو لهم على شوية صواريخ عشان يقدموها هدية للاطفال غزة في راس السنة ويعملو العاب نارية يعنى وحاجات زى كده وينبسطو هم اللى فهمو الموضوع غلط ووقفو تحت الصواريخ دى غباء بقى بعيد عنكم

وبعد دا كله لسه يا عرب يا مفتريين لسة بتظلمو ماما امريكا وخالتو اسرائيل وبتتهموهم بالتهم الوحشة دي امتى بقى تفكيركم هيتعدل كده وتبطلو ظلم الناس البريئة اللى بتحبكم ومش عارفة ترضيكم ازاي يالهووووووووووووى عليكم مش عارفة لو انا مفهمتكمش الكلام ده في الوقت المناسب كنتو هتعملو ايه من غيري وهتفضلو ظلمة كده لحد امتى

طبعا انتو بتقولو عليا الست دي اكيد اتجننت رسمى بس الواحد لو خد الموضوع زي ماهو في الحقيقة والواقع هيتجنن ويلسع بجد وخصوصا مناظر الاطفال اللى بتطلع لنا كل يوم 20 مرة مع الاخبار لكن لانملك لهم الا الدعاء والكلام قد ايه الواحد حاسس بقلة الحيلة وهو بيقول الكلام ده لكن هذا ما تملكه يدانا اللهم انصرهم واعنهم وسامحنا والله شئ لايقدر عقل يصدقه ولا يقبله

وفي الاخر مش هقول دع الخلق للخالق المرة دي زى كل مرة لكن هقول

(( بجد ياغزة علمتينا العزة لا يا اطفال غزة علمتونا العزة))

وربنا ينصركم ويفرج كربكم

اعذروني ووحشتونى

2008-12-27T03:40:00.005+02:00

اخواتى واخوانى وحشتونى جدا ووحشنى التواصل معاكم

اولا اعتذر انى سافرت سفر طويل من غير ما اودعكم

ثانيا اعتذر برضه عشان الدنيا وزحمتها اخذتنى منكم

اما ثالثا بقى اعتذر كمان عن تقصيري في التواصل معاكم وسامحونى ووحشتونى جداااااااااااااااا

واوعدكم مش هتأخر عنكم تانى ابدااااااااااااا

وقريبا جداااااااااا هاجيلكم بمواضيع تعجبكم

وكالعادة يلا احنا مالنا ((دع الخلق لخالق))

خلص تارك من اللى جارك

2008-06-19T01:37:00.009+03:00

خلص ثارك من اللى جارك ده مثل قديم كانو بيقولوه لما واحد يتظلم من حد اكبر منه سنا اوحتى اكبر في التدرج الوظيفي يروح منتقم من اللى بعده واللى بعده ينتقم من اللى بعده وهكذا ............... يعنى المدير يزعق للاب الموظف او يجازيه او يخصمله يروح الاب البيت يزعق للام ويشخط وينطرتروح الام هي كمان مطلعة عين الابن الكبيرشتيمة وضرب والتحابيش وطبعا الواد هيسيب حقه لا طبعا يروح يخلص تاره من الاصغر منه وهكذا يبقى كده كل واحد بيخلص ثاره من اللى جاره ده بالظبط اللي حصل في امتحانات الثانوية العامة متستغربوش وتعالو شوفو الموضوع من الاول الوزيرأخر تطبيق كادر المعلم المدرسيين ماتو من الغيظ وملقوش حد يخلصو تارهم منه الا الطلبة طلعو عينهم في المدرسة وغصبوهم على الدروس وطبعا المدرسيين اتفقو ما بينهم سلمنى نظيف اسلمك نظيف يعنى مدرس يشرح ومدرس تانى يراجع ويحل امتحانات يعنى المادة الواحدة بقى فيها درسين يلا اهي سبوبة والكل بيسترزق وطبعا الطلبة اللى هلكو من الدروس والواجبات والمشاويررايحيين جايين هيخلصو تارهم من ميين؟؟ الا من ماما وبابا اللى جابونا عشان هم يلطشو فينا شوية والمدرسيين يكملو علينا شويتين يلا بقى لازم ناخد ثارنا عايزيين دروس زيادة وعايزيين اكل حلو يفتح نفسنا على المذاكرة وطبعا بابا وماما بيحطو همهم في بطنهم ويقولوا حاضر وطيب ومن عنينا وفي تفكيرهم يضربو اخماس في اسداس هيلغو كسوة الشتا ولا هنستلف ولا هنعمل ايه يلا ربنا يدبرها امال هنيجي على الاخر ونضيع تعب الواد ولا البت والمفروض ان الموضوع كده خلص لالالالالالا طبعا فيه طرف تانى متغاظ وبيغلي وهيموت وينتقم عارفيين الطرف ده مين الموجهين اصل انا نسيت اقولكم ان الكادر التعليمي هيطبق على المدرسيين فقط فكرو ازاي ينتقمو قالو طيييب بقى المدرسيين عامليين زي المنشار طالعيين واكلين نازلين واكلين وعملو على قلبهم اساتك مقفلة في البنك قد كده طبعا مش قر ولا حسد (جاتنا نيلة في حظنا الهباب ) خدنا ايه من التوجيه هب وجاتلهم فكرة شيطانية توقف سوق المدرسيين وهي انهم يجيبو امتحانات تعجز الطلبة وتعقدهم وتخليهم يطلعو من الامتحانات يسبو ويلعنو في المدرسيين والتعليم والبلد كلها ويقولو خلاص بقى الدروس دي ملهاش لازمة واوعى حد يا خد دروس تانى كده كده ساقطين

بس لحد كده الثار مخلصش لان العيال اللى طالعيين منهاريين من الامتحانات ومنهم انتحر ومنهم جالو انهيار عصبي اكتر من اهالى ضحايا العبارة اياها والابهات والامهات اللى ربطو بطنهم وصرفو على ولادهم كل ما يملكو وطالعيين كمان مديونين دول هيخلصو تارهم من ميين والله حراااااااااااااااااااااااام ايه الهدف من تحطيم الشباب اللى لسه طلع في الدنيا ونكرههم في نفسهم وتهون عليهم حتى حياتهم لما الدنيا بتسود في وشهم

والله حراااااااااااااااام ليه نسيب ناس معقدة نفسيا تطلع عقدها على عيالنا وتحطم احلامهم في ثانية يعنى تعب 24 شهر يروح ببساطة كدة في ساعتين الامتحان والله حرااااااااااااااااام انا واحدة من الناس اللى مقهورة على بنتنا اللى تعبت وشقت واعطت كل مجهود وكل ما كانت تريح شوية اقولها شدي حيلك هانت وبكرة لما تجيبى مجموع عالى وتدخلى كلية كويسة هتنسي كل التعب

والله حرااااااااام فلوسنا اللى ضاعت وشقانا على ولادنا سنتين والميزانية اللى على طول كانت مخرمة بسبب فلوس المدرسيين وحرمان البيت بالكامل من كل الاساسيات والرفاهيات عشان نوفر للدروس والله حرااااااااااااااام لمصلحة مين تلف الاعصاب والتوتر وحالة الطوارئ في البيت لا دا في العيلة بالكامل ممنوع مجاملات ممنوع تليفونات ممنوع الزيارات ولستة ممنوعات والله حراااااااااااااااام لما يكون المكافأة في الاخر امتحان يجيب للطالب انهيار عصبي ولا انفجار في المخ ولا يحطمهم والله حراااااااااااااام لما عشان موظف معندهوش ضمير يسرق الامتحان ويسربه يتعاقب بنتى او ابنى باعادة الامتحان او الصعوبة في التصحيح قدامكم صرخة كل الامهات لضحايا الثانوية العامة واللى يعرف يقولى الى بيحصل ده لمصلحة مين (حسبي الله ونعم الوكيل في كل اللى ظلم ولادنا او نزل من عينهم دمعة)

اسفة اذا كان اسلوبي فيه حدة بس والله اولادنا يستاهلو اليكم اروع ما كتب عن امتحانات الثانوية السنة دي (نموذج امتحان)

أسئلة محشش حاقد على الطلاب امتحانات الثانوية العامة

---------------------------------

اسم الطالب:

ملاحظة هامة / والذي نفسي بيده لنطلعك ناسي اسمك

الفرع: علمي علمك

المادة: اللغة العربية

=======================================

هذا الامتحان برعاية ماجي - المرقة الأكثر رواجا

=======================================

ملاحظة: اجب عن الأسئلة التعجيزية التالية و عددها ( 6 ) إجباري و ( 1 ) اختياري على أن يكون مجموع الأسئلة (7). تنبيه: هذه الأسئلة لا علاقة لها بمسابقة - مـن سيـربـح المـلـيـون – لذلك تمنع مساعدة الصديق أو أي وسيلة أخرى (بضم الهمزة).اعرفكم ممكن تعملوها ، لكن أنالكم بالمرصاد .

--------------------------------------------------------------------------

السؤال الأول (20 علامة )

قال الشاعر معبرا عن مشاعره و أشواقه، و واصفا محبوبته في القصيدة المحرفة والناقصة الآتية : نزلت للبحــــر تتشمـــس الحلــــوة رفقــــا بالبشـــر بنــت حــــــــوا نـزلت لبحــــر يا محــــلا مشيتـــها .. موسيـقى بـيتـهـوفن عيــني يا ضـحكـتـها غزالــة ..عـروس و تـريـدها أمـي لي سـيـدة لـبـيــتـي و ..أنـا قـصـدي شريـف و صـادقـة نـيـتـــي ...

الأسئلة:

1- اشرح الآبيات الخمسة الأخيرةفقط من النص بما لا يقل عن 50 سطرا باختصار شديد (9 علامات)

2- لماذا اختار مدرس المادة القصيدة السابقة ولماذا أجبت أنت على هذا السؤال ؟ (5علامات)

3- استخرج من البيت الثالث صورتين فوريتين مبينا نوع الكاميرا والفيلم المستخدم(4 علامـات)

4- ما هي صفات العروس التي تريدها ام الشاعر ؟(3 علامـة)

==============================

مساحة خالية للإعلان- ت: اثنين صفر وثلاثة خضر

==============================

السؤال الثاني ( 8 علامات ) أعط أسباب ما يلي مع شرح الوافي :

1- تم نقل السوق المالي إلى سوق السمك ؟ (2 علامـة)

2- إقبال المشاهدين على قناة الجزيرة الإخبارية؟ (2 علامـة)

3- إغلاق شبكة الأخبار Pnn بعد زواج شارون ستون ؟ (2 علامـة)

4- أسباب اندلاع الحرب بين ..... و .... ما فيش فرق،اختر أي حرب، ماهوأنت راسب راسب ؟ (2 علامـة)

*** أخي الممتحن أقلب الصفحة: علىَّ الطلاق لتندم على الساعة اللي دخلت فيها المدرسة ***

---------------------------------------------------------------------

السؤال الثالث –اختياري- (5 علامات)

اكتب الاسم المستوفى من السؤال :ما اسم عم إيزابيل الذي هجرها في الحلقة السابقة من المسلسل المكسيكي الذي يأتي يوم السبت ؟( ورد ذكره في مسلسل كاساندرا أيضا )؟ (5 علامــات)

__________________________________________

==================================================

فاصل إعلاني: اشتري عبوة سيريلاك و اربح علبتين بامبارز مجانا ،العرض ساري حتى نهاية الامتحان

==================================================

السؤال الرابع (8 علامات) :

ورد في التلفزيون السوري دعاية "رقائق أبو اللبن" العبارة التاية للمخرج فواز جابر: " عبالك اوزي، تنتين بتعوزي، عيار الرز و اللحمة مفرومة يا سوزي، بازيلا صنوبر و رشة بهار...."

الأسئلة :

1- اذكر وصفة الطعام المختلفة التي وردت في كافة دعايات "أبو اللبن" و "ساراميكس" (4 علامــات)

2- اضبط بالبهارات ما تحته خط (2علامـــة)

3- في أي صفحة سيكون رقم هاتف المخرج في "دليل هاتف"باعتبار أخذ أولا الأسماء، متبعا القاموس المحيط؟ (2 علامـــة)

---------------------------------------------------------------------

السؤال الخامس (20 علامة)

موضوع تعبير :

قال أحدهم: "ام احمد، شوصار، واحد صفق واحد طار، أبو وصفي لا تحتار، اقعد و شوف عالمكشوف، ما حنقلك شوحتشوف. السؤال:اكتب موضوعا عن عائلة ام احمد، و بين فيه علاقة فرحان بكل من سمر و ام احمد و تطورها قبل و بعد ربح جائزة اليانصيب (20 علامة)

============================

المشروب الرسمي لهذا الامتحان هو ====زيــــت الــســمــســم

================================

*** أخي الممتحن أقلب الصفحة ولا بتشوف شي ما شفته*** _________________________________________

السؤال السادس ( 19 علامات)

اجب عن أربعة فقط من الأسئلةالتالية :

1- ما رأيك بتصرفات "أبو طراقة" و "ابن الوهاج" في مسلسل الجوارح (5 علامــات)

مبينا رأيك بمنجزات الباشق و أسامة و عقاب.

2- مارأيك بموقف "الكاسر" من "شقيف" في مسلسل الكواسر (5 علامــات)

3- من برأيك أقوى وأفضل بوكيمون ؟! هل هو بيكاتشو ؟؟؟ (5 علامــات)

4 – اذكر أسماء أبطال كابتن ماجد، مع بيان فريق كل منهم. وما عدد الأهداف التي سجلها الكابتن ماجدفي كأس العالم الأخيرة في فرنسا 1998. (4 علامـات)

==================================================

عرض "فاست لينك" الجديد من سمعان أبو رنه ، اشترك في موبايلكم واربح ساعتين " فاست لينك"مجانيتين =

==================================================

سؤال المساعدة (إحباطي)( 20 علامــة)

أ – اذكر أسماء 3 من رؤساء بلدية لقرية يوكوزوهريتاشاناتا اليابانية من ثلاثة مقاطع مع عدد السنوات التي ترأسوا فيها البلدية ؟

ب – أذكر أسماء زوجات 5 ممن ماتوا في قصف مدينةهيروشيما اليابانية عام 1945 بالقنبلة الذرية على أن تكون إحداهن شقراء.

السؤال الاخير:

كم فتاة حذفتك بالايميل بطريقه غير شرعيه ..؟ومااسمائهن؟وايش لابسين..؟حلوين ولا لا؟

((((مع تمنياتي لكم بالرسوب والفشل ))))

الأستاذ/محشش بن حاقد على الطلاب

يلا ماعلينا (( دع الخلق للخالق ))

2008-06-05T05:05:00.010+03:00

الرقص تأديب وتهذيب واصلاح

حكاية البوست انهارده تخص ولادنا كبار وصغيريين بس الكلام ليكم انتو يا ستات احنا نص المجتمع واحنا اللى بنربي النص التانى اللى هم (اجوازنا) واولادنا افتكرو معايا في ايام ماكنا طلاب في المدارس والكليات كان حفلات نهاية العام الدراسي بيدعو فيها اوائل الدفعات السابقة واشهر الخريجين يعنى دكتور مشهور اتخرج من المكان ده او عالم او كاتب او اي شخص مفترض انه يكون قدوة للطلبة اما دلوقت مدرسة ثانوى بتجييب في حفلة التخرج بتاع الثانوية العامة دينا الرقاصة ونيكول سابا راحت فين القدوة اللي بندور عليها لاولادنا مش مهم مين السبب او مين اللى اتفق او جابهم ولو ان الكارثة ان اللى اتفق معاهم تربويين حاطيين ولادنا امانة بين ايديهم يعلموهم ويربوهم والادهى من كده انها مش حفلة الطلبة الوحيدة اللي احييتها دينا لكن دي رقم 150على حسب كلامها في التلفزيون

ايه اللي حصل للمدرسيين والتربويين في مدارسنا خصوصا المدرسة الاخيرة اللى عملت كده المفروض كان معروف عنها الشدة والمستوى التربوي العالي لكن ايه اللى خلاها انهارت كده ايه اللي حصل في الدنيا. لكن المهم ان الموقف ده يحتاج وقفة مع نفسنا مدرسيين واولياء امور ونشوف احنا بنربي اولادنا على ايه ولمصلحة مين. كل واحد منا اول ما يجيلو طفل ولد ولا بنت يبقى نفسه يطلعه دكتور ولا مهندس ويلبسه احسن لبس ويأكله احسن اكل لكن للاسف قليل منا اللى بيفكر انه يحط قدام ولاده قدوة اي قدوة مثلا زويل ولا صلاح الدين ولا سميرة موسى وغيرهم كتيير يعنى المقصود قدوة علمية ولا دينية

لكن اللى حصل ان الولاد طلعو في وسطنا احنا الكبار ابهاتهم وامهاتهم والخالات والعمات وكمان المدرسين شافونا بنتفرج على الفيديو كليبات الجميلة اللى مفيش حد فيها متغطي الا بالقطع الضرورية اللى لايمكن الاستغناء عنها ونصقف لهم عشان يرقصو عالموسيقى كمان من غير ما نحس بردنا دم ولادنا وشيلنا منهم النخوة والحياء وعودناهم على الهيافة ومبقاش فيه حاجة عندهم اسمها عيب تحت مسمى انهم يكونو روشيين وكوول لما بقو مسخ

انا مش عايزة ابقى قاسية عليكم يا ستات لكن تعالو اتخيلو معايا ان كل واحدة مننا دخلت على جوزها ظبطته بيتفرج على كليب من اياهم طبعا انا عارفة ايه اللى هيحصل والراجل الغلبان هيعيش اسود لحظات حياته لانك طبعا هتغيري عليه ازاي تشوف الحاجات دي هو انا مش مالية عينك ........................ والباقي معروف

طيب ازاي يا ست الكل متكنش عندك غيرة على ولادك وعلى اللي بيشفوه زي ما بتغيري على ابوهم. ياريت منكنش السلاح اللى اعداء امتنا بيضربو بيه ولادنا عشان يطلعو جيل هايف تافه ملهوش هدف ولا قدوة ولا قضية لان ولادنا غاليين قوى وربنا حطهم بين ايدينا امانة هيسألنا عليهم يوم نقف بيين ايديه عملنا ايه في الامانة صناها وادينها ولا ضيعناها والعياذ بالله. الكلام ده انا بفكر نفسي وبفكركم اننا لازم نقف واقفة نصلح فيها سلبيات حياتنا كلها وخصوصا ولادنا ونراجع امومتنا وابوتنا مرة تانية.وفي الاخر اقولكم يلا

(( دع الخلق للخالق))

2008-05-20T00:51:00.016+03:00

يلا نساعد بعض

البوست انهارده يمكن يكون صعب او دمه تقيل لكن الحال اللى احنا عايشينه اليومين دول هو اللى فرض عليا الموضوع ده .

كلنا شايفين حال الناس مع موجة الغلاء اللى طايحة في البلد ومفيش حد فينا الا وليه قريب او صاحب كنت حالته تعبانة قبل الغلاء وبقت بؤس بعد ارتفاع الاسعار .

لكن فيه حاجات بسيطة ممكن نعملها لحد ما نعدي الازمة دي انشاء الله على خير خصوصا ان كل الخبرا والمسؤليين اللى بيطلعو يتكلمو عن ارتفاع الاسعار بيقولوا ان احنا على ابواب كارثة السنة اللى جاية في الغذاء . تعالو ندخل في الموضوع ونتفق على شوية حاجات نعملها مع اهلنا وجيرانا واصحابنا ومعارفنا .في الاول نبدأ من جوا بيوتنا وعاداتنا الغلط يعنى يا ستات البيوت يا جمال يا مدبرات تعالو نتفق مش هنشتري الا الضروري جدااااااااا بس ومش هنجيب منها كميات يعنى نشتري طلبات اسبوع واحد كفاية وبلاش نشتري حاجة الشهر مرة واحدة ونستغنى عن الكماليات .

نحاول منرميش اي أكل او عيش يعنى اذا مش بتحبو الاكل تانى يوم نعمل اكلنا على الاد يوم بيوم واذا صادف وزاد شوية نديه لحد محتاج بدل ما نرميه لان والله فيه ناس الايام دي بتاكل من الزبالة فحرام علينا نرمى اي شئ ولو بسيط . ياريت نقعد مع اهلنا ونتفق نعمل زى جمعية كده كل واحدة فينا وهي بتشتري طلبات بيته تزود صنف اساسي واحد بس وكل واحدة ومقدرتها يعنى واحدة تزود 2 كيلو رز او سكر او ازازة زيت او صلصة يعنى كدة وبعدين نجمع الحاجات دي ونوديهم لبيت قريب لينا يكون حالته المادية تعبانة ونوديهم في صورة ود وزيارة جميلة . واذا نجح الموضوع ده ننشره بين اصحابنا ومعارفنا يمكن ده مش هيحل المشكلة بتاع الغلاء لكن على اقل هيفك ازمة عن حبايبنا اللى الغلاء طاحنهم وعزة نفسهم بتمنعهم من الشكوى . وكمان ياريت نعود ولادنا على عدم الاسراف وان فيه حاجات كتير مش هنموت لو مجبنهاش وممكن نستغنى عنها . وانهم كمان يشاركو زملائهم اللى مش قادرين معاهم في الشيبسى والبسكوت اللى بيشتروه من المدرسة من غير ما يجرحوهم وده هيشيل الانانية منهم وهيعودهم على المشاركة. في ناس هتقول على كلامي ده زي كلام الكتب او مثالية زايدة لكن صدقونى نقطة على نقطة تتملى الكباية ونشيل بعض لحد الازمة ماتعدي . ويمكن لما قلبنا يبقى على قلب بعض ونحس ببعضنا يفرجها علينا ربنا ويشيل الغمة عننا ويحل الرخا على كل المسلمين. سامحونى اذا كان الموضوع طويل او تقيل بس لازم نعيش مع بعض الالم والامل وفي النهاية (( دع الخلق للخالق ))

أبو الغيط الجديد موديل 2008

2008-04-30T18:49:00.005+03:00

حكايتى الاولى ليكم تخص الستات الحوامل حبايب قلبي اللى بحبهم وخايفة عليهم وخصوصا اللى على وش ولادة. أمي قالت لي زمان في الفلاحين لما الست كانت بتروح مع جوزها الغيط لو ولدت في الغيط مهما كان اسم المولود كان الناس بينادوه ابو الغيط ويلزق فيه الاسم ده على طول!!! وانهارده موضوعي ليكم شبه كدة بس احدث طبعا اصل الدنيا بتطور امال ايه. تصدقي يا ختشي انتشي وهي ان ام محمد ولدت محمد ابنها البكري في طابور العيش من كام يوم كده بعد ماوقفت تلات ساعات في الطابور ولو عملنا زي زمان هنسميه ((ابو طابور)) هههههها حلوة الاسم ده. المهم انا نبهتكو اهو اللى حامل منكم في التاسع ولا حتى في السابع محدش ضامن تعمل شنطة فيها غيار للعيل وتاخدها معاها وهى نازلة تجيب العيش ومتخافوش خالص دي حتى وقفة الطابور بتسهل الولادة واللى بتولد في الطابور هتاخد العيش بسرعة. والحكومة من جهتها هتجهز في كل فرن اوضة للولادة عايزين ايه تانى هتنهبو بقه اسيبكم عشان تلحقو تحضرو شنطة الولادة وتلحقو الطابور بدري. وحمدلله على سلامتك ياست ام محمد ((ابوطابور)) وعقبال اخواته يلا احنا مالنا (( دع الخلق للخالق ))