يا غزة علمتينا العزة

ملقتش موضوع ارجع لكم بيه بعد الغيبة افضل من موضوع غزة وما يجرى لاخواننا فيها من بداية حرب الرصاص المتدفق الاخيرة

انا واعوذ بالله من قولة انا شايفة الموضوع من زاوية تانية خالص شايفة اننا مزوديين الموضوع حبتين لاننا مش فاهمين الموضوع صح !!!!!!!!!!!!!!!!

متستغربوش قوى كده الحكاية كلها ان اسرائيل فكرت ازاي تكسب ود السلطة الفلسطنية وتتقرب للحكومات العربية ملقتش شماعة قصدى حل قدامها الا انها تخلص الناس من حماس اللى عملة مشاكل كتير مع السلطة من ناحية ومع الشعب من ناحية تانية وآخرهم مشكلة تأشيرات الحجاج الفلسطنيين وطبعا اسرائيل خافت انها تحمل ذنب الحجاج دول راحت داخلة بتقلها وخاطرت بنفسها وقررت انها تساعد الفلسطنيين حكومة وشعبا وتخلصهم من حماس وطبعا لما بدا حسن نية اسرائيل الحكومات العربة مكدبتش خبر وساعدت اسرائيل وشالتها على كفوف الراحة بالسكوت والطناش لحد ما تخلص مهمتها السامية في المنطقة

بس قلبهم مش جايبهم ومش هاين عليهم ماهم اللى بيتقتلو برضو مسلمين وعرب والدم يحن وعلى رأي المثل انا واخويا على ابن عمى وانا وابن عمي على اسرائيل فقالو يرضو ضميرهم العربي بشوية مفاوضات كده يمكن تهدي الجو ووالله ما قصرو

وطبعا كالمعتاد كل ما يجتمعو نفرح ونقول هنتوحد اهو وهنطلع من الاجتماعات والمفاوضات بحاجة مفيدة بس الفرحة مش بتطول ونفوق على الحقيقة المرة ونقول يا فرحة ما تمت خدها الغراب وطار

اما بقى الشهداء دول عمرهم انتهى لحد كده وزى ما كلنا عارفين محدش بيعيش ثانية زيادة عن اجله وزي ما هو معروف تعددت الاسباب والموت واحد وكمان في دي اسرائيل كان ليها غرض سامي جدااااااااااااا

اسألونى ايه هو ؟؟؟

هعتبركم سألتونى وهجاوب

اولا عشان تعلى منزلتهم وتكون سبب في شهادتهم ودخولهم الجنة انشاء الله

ثانيا انتو عارفين طبعا اننا بدأنا سنة جديدة وهى 2009 كل سنة وانتو طيبين وعزرائيل كان عنده شغل كتير تقفيل السنة بقى عشان نبدأ سنة جديدة على نظيف فحبت اسرائيل تساعده وتموتله شوية كده بالجملة يعنى ومش خافي عليكم الشبه الكبير بين كلمة(عزرائيل واسرائيل) شفتو بقى انكم دايما ظالمينها يا شررين

نيجي بقى لاهم جزء في الموضوع اطفال غزة دول بقى لوحدهم حكاية فيهم جزء مش اطفال ولا حاجة دول كانو من قادة حماس بس اتسخطو كده من الخوف بعد اسرائيل ما بدأت القصف

وجزء تانى كان بيفكرو لما يكبرو يحابو اسرائيل طيب خليكو مكانها هتسيبهم لما يكبرو طبعا لا من حقها تكسر دماغهم متدافعش عن نفسها يعنى

وفيه كمان جزء من الاطفال غبي شويتين اطفال اسرائيل الطيبيين وقعو لهم على شوية صواريخ عشان يقدموها هدية للاطفال غزة في راس السنة ويعملو العاب نارية يعنى وحاجات زى كده وينبسطو هم اللى فهمو الموضوع غلط ووقفو تحت الصواريخ دى غباء بقى بعيد عنكم

وبعد دا كله لسه يا عرب يا مفتريين لسة بتظلمو ماما امريكا وخالتو اسرائيل وبتتهموهم بالتهم الوحشة دي امتى بقى تفكيركم هيتعدل كده وتبطلو ظلم الناس البريئة اللى بتحبكم ومش عارفة ترضيكم ازاي يالهووووووووووووى عليكم مش عارفة لو انا مفهمتكمش الكلام ده في الوقت المناسب كنتو هتعملو ايه من غيري وهتفضلو ظلمة كده لحد امتى

طبعا انتو بتقولو عليا الست دي اكيد اتجننت رسمى بس الواحد لو خد الموضوع زي ماهو في الحقيقة والواقع هيتجنن ويلسع بجد وخصوصا مناظر الاطفال اللى بتطلع لنا كل يوم 20 مرة مع الاخبار لكن لانملك لهم الا الدعاء والكلام قد ايه الواحد حاسس بقلة الحيلة وهو بيقول الكلام ده لكن هذا ما تملكه يدانا اللهم انصرهم واعنهم وسامحنا والله شئ لايقدر عقل يصدقه ولا يقبله

وفي الاخر مش هقول دع الخلق للخالق المرة دي زى كل مرة لكن هقول

(( بجد ياغزة علمتينا العزة لا يا اطفال غزة علمتونا العزة))

وربنا ينصركم ويفرج كربكم