السبت، 21 مارس 2009

قبلة على خد امي

انحنى حبا وامتنانا لامي الحبيبة واقبل خدها وايديها ورجليها واقول لها كل سنة وانت طيبة الف مرة كل سنة وانت تاج على رؤسنا دايما يا حبيبتى ويخليكى ليا ولاخواتى ولاولادنا يا ست الحبايب
ربنا يجازيكى مليون خير يامى عنا وعن تربيتنا قد ايه تعبتى لوحدك وقاسيتى لوحدك لحد ما طلعتينا بنات كل الناس بتشهد بدينا واخلاقنا و الحمد لله وربنا كافئك على صبرك على فقد الابن الاكبر والولد الوحيد اللى جرحك في قلبك وبعده فقد الزوج اللى سابك لوحدك وفي رقبتك تلات بنات اكبرهم مخدتش الثانوية لكن بالايمان ربنا هداكى للطريق السليم في توجيهنا وتربيتنا تربية تلات بنات مش سهلة وكفاية ان الرسول صلى الله عليه وسلم بشر اللى بيربى تلات بنات ويحسن تربيتهموتأديبهم زيك كده ان شاء الله يدخل الجنة ووفقك في جوازتنا وعوضك بصبرك على فقد الابن بتلات مهندسين زى الفل كلهم بيحبوكى وبيعاملوكى امهم مش حماتهم ويتمنو رضاكى وببركة صبرك ودعواتك لينا توج حياتك ب 7 أحفاد زي القمر أسد و6 قطط او بالاصح 6 بنات وظابط صالحين انشاء الله ربنا يجعلهم ليكى ولينا سند وعزوة وينبتهم نباتا حسنا بأمر الله وبدأنا نحس ان الدنيا ليها وش حلو وسعيد كنا بنشوفه في كل مرة بنتجمع فيها حواليكى نسهر ونضحك ونلعب لدرجة ان فيه ناس سألتنا هو انتو على طول بتضحكو كده ميعرفوش ان احنا في كل حياتنا كنا بنسرق الفرحة من الدنيا اللى كانت قاسية علينا طول العمر كنا بننتهز فرصة جوازة ولا ولاده ولا نجاح ونفرح بانتقام عشان مش عارفين بكرة مخبي لنا ايه لكن لان الناس ملهاش غير الظاهر بس كانت شيفانا بنبالغ في الفرح بالحاجات دى ميعرفوش ان اللى اتربى يتيم دايما نفسه مكسورة وعشان كده لما تيجيله حاجة تفرح بيفرح قوى على قد ما حزن قوى
لكن ربنا حب يختبرك ويختبرنا ولأن الدنيا دار ابتلاء مرض زوج اختى الوسطى مرض شديد وهو دلوقت بيمر بمحنة قوية لكن ان شاء الله هتعدى بخير ويرجع لولاده ولينا بالف سلامة وترجع لمتنا الحلوة تانى واحنا زايديين مش ناقصين وكلنا بصحة وعافية وهو ده شغلنا الشاغل دلوقت اننا نخلي اكبر عدد من الناس اللى قلبهم طيب يدعوله ربنا يعفي عنه ويشفيه ويشفي كل مريض يارب ماهو ربنا اللى قدر ابتلاؤه قادر على رفع بلاؤه والامر بشفاؤه (( اسأل الله العظيم رب العرش العظيم ان يشفيه شفاء لايغادر سقما))
اسفة على الاطالة وعلى ان تهنئة عيد الام عندي اخذت شكل درامي
لكن من قلبى بقول لكل ام كل سنة وانت طيبة وربنا يخليكى لاولادك
وكل اللى نفسها تبقى ام كل سنة وانت طيبة وكل سنة وانت ام لكل اولاد اخواتك واصحابك والسنة الجاية اولادك يزيدو واحد بابنك او بنتك ان شاء الله
ومش هقول ماعلينا دع الخلق للخالق لكن المرة دي هقول ((ادعو الخالق ان يشفيك يا اخي وزوج اختى الغالى)) يارب تقبل دعائنا له بظاهر الغيب

هناك 5 تعليقات:

سكسكة يقول...

مش عارفة اقول هية انا اول تعليق لاني الحقيقة بأوأ مش فاضية لكن هاقول ربنا كريم ومافيش اكرم منة وان شاء اللة يشفية ليكم جميعا وتتلموا تاني ويعوضكم عن الفترة الصعبة دي زي ماعوضكم قبل كدة وعوضنا جميعا عن اي ايام صعبة صبرنا فيها وبرضة ياولاد دة حال الدنيا مش ممكن تكون حلوة علي طول ولا هانحس بجمال الجنة ازاي ربنا يرزقنا بيها جميعا ان شاء اللة ومامتك ماشاء اللة اللهم لاحسد عندها 3 بنات تربيتهم جميلة ماشاء اللةوكمان ان شاء اللة تزاحم النبي عليةالصلاة والسلام في الدخول للجنة علي صبرها علي تربيتكم وصبرها علي فقد ابنها ربنا يريح قلبها ويشفيلها جوز بنتها في الدنيا ويرزقها الجنة في الاخرة وتتشفع فينا احنا غلابة برضة وهية ست طيبة ان شاء اللةاااااااااااااامين

كلبوزة لكن سمباتيك يقول...

اكيد مامتك فعلا انسانة عظيمة علشان تربي انسانة جميلة زيك بتدعي لكل الناس و تتمنى الخير لكل الناس
ربنا يديلها الصحة و العافية و يبارك في عمرها و يفرحها بيكي و باخواتك و احفادها امين يا رب العالمين


من قلبي بدعي لزوج اختك ربنا يشفيه و يقومه بالسلامة و يرجعه لبيته سالم معافى


بمبتي ...انا بحبك موت طحن تقطيع و مش عارفة اعمل اية يا ناس يا هو علشان اسعد الست دي على رأي فطوطة
أأأااطع نفسي ؟؟ أأأاموت نفسي؟؟

ربنا يجعل ايامك كلها فرح و سرور و يشرح صدرك و ييسر امرك
خد من قلبي و سر

قبلاتشي
و اوروفوار

كلبوزة لكن سمباتيك يقول...

سكسكتي
نفسي تفتحي مدونتك بقى و تكتبي لنا احلى بوست و نبقى الثلاثي المرح في بلوجر
بس تعرفي يا سكسكة الخوف لنجيب ضرف بلوجر ما احنا اصلنا سوابق
ههههههههههههه
يلا بلاش خليه ياكل عيش
بحبك يا سكسكتي انتي و بمبتي و يا رب يديم علينا الاخوة و المحبة في الله
قبلاتشي
و اوروفوار

سكسكة يقول...

ماتقلقيش ياكلبوزتي ان ش اللة عمري ماهاخاطر انا مش عبيطة اقطع عيشكم انتم كدة كفاية اكتر من كدة اخاف علي جوجل شخصيا ربنا مايحرمنيش منكم ابدا ويديم محبتنا في اللة ويطمنا علي بمبة حبيبة قلبنا ويريح بالها يارب

غير معرف يقول...

滿...........................