الاثنين، 11 يوليو 2011

الارض راحت فين كانت تحت رجلنا من شوية

فيه حالات الواحد بيحس فيها ان رجليه مش على الارض لما بيحس انه طاير من الفرح مثلا زي ما حسينا يوم خلع الرئيس السابق لكن كمان
احنا دلوقت حاسة ان رجلنا مش على الارض وان الارض الثابتة بتبعد عن رجلينا كل يوم عن اللى قبله
احنا كنا ماشيين صح الثورة اسلوبها كان راقي جدا وكل العالم بيحكى بيها وبالرقي اللى في الثوار اللى خرجو سلميين وهما بيضربو بقنابل الغاز و الميه مفرقاهم في عز الشتا ومش بيرددو الا سلمية سلمية
ايه اللى حصل بقى؟ هل كل البلطجة دي سلطة ونفوذ اعضاء الحزب الوطنى واتباع الوزراء اللى مشرفين في طره لاند ؟ولا دول اتباع الهاربين في لندن وسويسرا واسبانيا اللى مازالو ايديهم طايلة لابعد مما نتخيل جوا بلدنا ؟ ولا فيه ايه غير كده؟
طيب لمصلحة مين ان الشرطة مترجعش للشارع بطاقتها الكاملة ؟ ولما ترجع يتسلط عليهم البلطجية يقتلو الظباط فتكبر مسافة البعد بين الشرطة والشعب والكره بينهم يزيد ويصبح متبادل
ولمصلحة مين الفتنه اللى بيحاولو يحطوها بين الجيش والشعب مع كل حب الشعب والناس البسطاء تحديدا للجيش واحساسهم ان الجيش اللى حاميهم ؟
ولمصلحة مين ان الحكومة اللى معظم اعضائها ناس محترمة يشهد لهم بنظافة الذمة واليد والوطنية مش بتاخد قرارات حاسمة لتحقيق مطالب الثوار الا بمليونية لكل طلب ؟
لمصلحة مين حالة الاحباط اللى وصل لها الناس دلوقت لدرجة انهم يفكرو في عصيان مدني ووقف الانتاج والخروج للشوارع بالاكفان لان بقدر الحماس والفرحة والفخر بعد الثورة اتحول كل ده لغصة واحباط ومرار في الحلق ؟
دى بلدنا اللى ثورنا علشان ننفض من عليها تراب 30 سنة من التخلف والقهر والقمع والظلم ؟ ولا دي حته تانية غريبة علينا ؟
معروف ان الفوضى شئ طبيعي بعد كل الثورات بس كان نفسي ثورتنا تختلف عن كل الثورات زى ماهى من ارقى الثورات باعتراف الدول المتقدمة
امتى هنقف على الارض الصلبة ونبص حوالينا نلاقي مصر الحلوة رجعت تانى ؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟
يارب يكون قريب ِ
يارب احنا حسينا بالحرية متكتبش علينا ابدا ان تتسرق منا حريتنا وثورتنا وكرامتنا يارب انصرنا على كل اللى طغو وبغو وافسدو ارضنا الحبيبة وكسرو قلوبنا الطيبة وجوعونا ومرضونا ونصبو انفسهم الهة تعبد في واللى يكفر بيهم يا ويله
مش هنهى البوست زي كل مرة بما علينا دع الخلق للخالق (( لانه علينا اننا نرجع بلدنا تاني ونحافظ على ثورتنا البنائة ))

هناك 6 تعليقات:

ندا منير يقول...

المشكلة انك بتتكلمى عن 30 سنة تخيلى عمر قد ايه الكل اتعود فيه على سلوكيات غلط
وكم الفساد اللى موجود صعي يتقضى عليه تمامام
اما الناس اللى عمالين يخربوا و يبوظوا كل حاجة فدا كله تبعا للنظام السابق لان مش مصلحتهم ابدا ان مصر تبقى قوية لانها لو بقت قوية يبقى هما ادمروا ولسة عندهم امل يدمروا كل حاجة كويسة عشان هما يخرجوا ويرجعوا تانى لنفس الفساد اللى كانوا فيه

Haytham Kilany يقول...

السلام عليكم
بدايه من الطبيعى بعد أنقضاء مرحله وبدايه مرحله جديده
بعد القضاء على الاحتلال ورجوع السلطة مرة أخرى للشعب لابد من وجود مرحله فوضى يسمونها فى علم الادارة storming يتخبط الكل فى الكل الى ان يستقر كل واحد فى مكانه ويبدأ الفريق فى العمل الفعال

ثانيا : يجب تقسيم الفساد الى قسمين
1- فساد بسبب المفسدين - النظام الفاسد
هؤلاء يجب ان يحاكموا وان يضغط على المجلس العسكرى بمليونيات يتبعها مليونيات للجد فى محاكمتهم والقضاء على رؤس الفساد

2- فساد الشعب - معروف اننا اتربينا على الرشاوى والوساطه والمحسوبيه
وعدم الاهتمام بالمجتمع والسلبيه وغيرها من السلبيات اللى أترسبت فينا خلال ال 30 سنه

لحل هذة المشكله نحتاج رؤس ( عمد - زعماء - وزراء - الخ الخ - يكون لهم توجه وتخطيط لضبط سلوك الناس والتوعيه المستمرة

أعتذر على الاطاله

خالتى بمبة يقول...

اختى ندا عندك حق لكن لازم نتغير حتى لو ده هياخد وقت لازم نستحمل علشان بلدنا تنهض

خالتى بمبة يقول...

اخي هيثم عندك حق وانا معاك جدا خصوصا في ان كل الرؤوس تختار بعناية لان سياستهم بتاثر في وعى الناس شكرا على مرورك

AHMED SAMIR يقول...

ما يحدث حاليا هو نتاج طبيعي لحالة الثورة التي تشهدها مصر
فقط الصبر.........الصبر يا بشر

غير معرف يقول...

ياجماعه لازم نتغير لازم نتغير